Saturday, January 16, 2010

ദാഹശമനി

അസൂയക്കാരനായ
വിരുന്നുകാരാ
കസാലയുടെ മൃദുമേനിയിലിരിക്കൂ
(കുഷ്യന്‌
സുന്ദരികളുടെ
ഉടല്‍ പോലെ
ഇത്ര മാര്‍ദ്ദവം വേണ്ട-എങ്കിലും)
വടിവൊത്ത കൈകളില്‍
കൈ ചേര്‍ത്ത്‌
കസാലചാരി
ശാന്തസാന്ദ്രമായ്‌ വിശ്രമിക്കൂ

പുറത്ത്‌
വെറുപ്പിന്റെയും
സന്ദേഹങ്ങളുടേയും
ഉച്ചവിരുന്നിനു പോകുന്ന കാലടികള്‍
നഗരത്തില്‍ നിന്ന്
വീട്ടിനുള്ളിലേക്ക്‌
ഉഷ്ണക്കാറ്റിന്റെ
ഒരതിവേഗപ്പാത

മേശമേല്‍
നിനക്കുള്ള പാനീയം
(ആവിയും ഇളം ചൂടും പറക്കുന്ന!)
ചുവന്ന മുന്തിരിച്ചാറു പോലുള്ള
മധുരപാനീയം

സ്ഫടികചഷകത്തിന്റെ
ഉള്ളിലേക്കുള്ള
കണ്ണിന്റെ
ഗതികെട്ട
പരക്കം പാച്ചിലൊന്നും വേണ്ടാ
സാവധാനം കുടിക്കുക
തണുക്കട്ടെയുള്ളം

ഞരമ്പു കീറീ
ഇപ്പോള്‍ തുള്ളി തുള്ളിയായി
ചോര്‍ത്തിയെടുത്തതേയുള്ളു

വെറുപ്പിന്റെ
കഠിനമാമീ
ഉച്ചവെയില്‍ക്കാറ്റിന്‍ വിരുന്നില്‍
ഞാന്‍ പകര്‍ന്നു തരുന്ന
മറ്റെന്തു ദാഹശമനിയാണ്‌
നിനക്കു മതിയാവുക.

3 comments:

  1. അസൂയയുടെ ദാഹമകറ്റാനാവുമോ ഈ ദാഹശമനിയ്ക്ക്‌...?

    നല്ല വരികൾ

    ReplyDelete
  2. ഞരമ്പു കീറീ
    ഇപ്പോള്‍ തുള്ളി തുള്ളിയായി
    ചോര്‍ത്തിയെടുത്തതേയുള്ളു

    ReplyDelete
  3. athusari!!virunnukaran DRACULA ayirunnu alle?

    ReplyDelete