സോളമൻ പറയാതിരുന്നത്....

വിളഞ്ഞ്
മണം പരന്ന മുന്തിരിത്തോട്ടം
വിളവെടുപ്പിനായി കാത്തുകിടക്കുമ്പോൾ
പക്ഷികൾ
അകത്തുള്ള വിത്തുകൾ
ദേശാന്തരങ്ങളിലേക്ക് കൊണ്ടുപോകുവാൻ
ധൃതിപ്പെട്ട്,
കൊക്കുവിടർത്തി
ചെരിഞ്ഞിരിക്കുന്നു...   
വീഞ്ഞ് നിറച്ച കനത്ത ജാറുകൾ
നാവുകളിലേയ്ക്ക്,
സിരകളിലൂടെ ശിരസുകളിലേക്ക്
പതഞ്ഞൊഴുകുവാൻ   വെമ്പി നിൽക്കുന്നു
പുഴകൾ മേഘങ്ങളെ പിഴിഞ്ഞെടുത്ത്
സമുദ്രത്തിലേക്ക് ഉല്ലാസപൂർവം മദിച്ചൊഴുകുന്നു
ഒരുവൾ അസ്വസ്ഥതയോടെ തന്റെ ഇരട്ടപെറ്റ മാൻ കുട്ടികൾക്ക്
പുൽമേടുകളിലേക്കുള്ള വഴി പറഞ്ഞുകൊടുന്നു
ആദമിനു വേണ്ടി ഒരു തോട്ടം തുറന്നുകൊടുക്കുന്നു
തണുപ്പത്ത് ഒരു കമ്പിളി സമ്മാനിക്കുന്നു
മുന്തിരിവള്ളികളിൽ കൂടി കാറ്റ് ആകാശത്തു നിന്ന്
താഴേയ്ക്ക് തൂങ്ങിയാടുന്നു
ഊഷ്മളത പരസ്പരം കൈയ്യുരച്ച്
തീകായുന്നു
നെറ്റിയിൽ വിയർപ്പുള്ള വെയിൽ
മുന്തിരിവള്ളികൾക്കിടയിൽ വീണ്
തളർന്നു മയങ്ങുന്നു