അഭിനയിച്ചു തീർക്കാൻ പറ്റാതെ പോയ റോളിൽ ഒരുവൾ

ഈ അഭിനയം
അവൾക്ക് പതിവുള്ളതാണ്
അയാൾക്കറിയില്ലെങ്കിലും

അങ്ങനെ
(പ്രണയരംഗങ്ങളിലെ)
ഷീലയോ ജയഭാരതിയോ ആയി
കണ്ണുകൾ പിന്നിലേക്ക് മറിച്ച്
കടൽത്തിരപോലെ തിമിർത്ത്
ചുണ്ടുകൾ ഭ്രാന്തമായിത്തന്നെ കടിച്ചുപിടിച്ച്
കൈകാലുകൾ വലിച്ചു മുറുക്കി
പഴയകാലങ്ങളിലേതുപോലെ
അതിഭാവുകത്വത്തോടെ
അഭിനയിച്ചുകൊണ്ടിരിക്കുന്നതിനിടയിലാണ്
ഒരു ദിവസം
അറിയാതെ
അവൾക്ക്
രതിമൂർച്ഛയുണ്ടാകുന്നത്

അയാളാണ്
ആദ്യം
പരിഭ്രമത്തിന്റെ
ഒരു വള്ളിപടർപ്പിനുള്ളിൽ
പെട്ടുപോയത്

അവൾ മരിച്ചെന്നാണ്
അയാൾ കരുതിയത്
പെട്ടെന്ന് ,
ചലനമില്ലാതെ,
വിളിച്ചിട്ടൊന്നും കൺ മിഴിക്കാതെ
കൈപ്പടം ചുരുട്ടിപ്പിടിച്ച്
ജലത്തിൽ മുങ്ങിമരിച്ചവളെപോലെ
മലർന്ന് കിടക്കുകയായിരുന്നു

അവൾ
അഭിനയിക്കാൻ മറന്നു പോയ
നിമിഷമായിരുന്നു അത്
അയാൾ
പരിഭ്രമത്തില്പെട്ട്
ജഡമായി ഒലിച്ചുപോയ നിമിഷവും

പിന്നീടവൾ
ഉയിർത്തെഴുന്നേറ്റ്
അയാളെത്തന്നെ
നോക്കിക്കൊണ്ടിരുന്നു
ഇമവെട്ടാതെ,
ഹവ്വ
ആദ്യമായി
ആദമിനെ കാണുന്നമാതിരി,
ആ രാത്രി അവസാനിയ്ക്കുന്നതു വരെ

അവിശ്വസനീയമായി

(സം)സാരം

നീ മരിക്കുമ്പോൾ
എല്ലാം നിന്നോടൊപ്പം
കുഴിച്ചു മൂടും

സഹിക്കുവാനാവില്ലെനിക്കു
നിന്നെ പേറുന്നൊരു ചെറു
സജീവമുദ്രപോലും

പട്ടുസാരികൾ, പുടവകൾ
പാവാടകൾ
കൈലേസുകൾ
ചുംബനമുദ്രകൾ
നെറ്റിൽ പൊട്ടുകുത്തിയ
തീവ്രപ്രണയ
സിന്ദൂര കാന്തികൾ
ഇനിയുമാഴം കണ്ടറിഞ്ഞിട്ടില്ലാത്ത വാക്കുകൾ
എല്ലാം

എന്നാൽ ശ്രദ്ധാപൂർവം
കൊളുത്തഴിച്ച്
ഉള്ളിലുള്ളിലൊരറയിൽ
സൂക്ഷിച്ചു വെയ്ക്കും

നിന്റെ സ്വർണ്ണ മാലകൾ ,വളകൾ,

മോതിരങ്ങൾ
പാദസരങ്ങൾ!

നിന്നെയോർക്കുവാൻ
ഇതിലേറെ വിലപിടിച്ചതായ്
മറ്റെന്തു കാണും
കാലാന്തരങ്ങൾക്കുമപ്പുറം?

പാഠം

വെളിച്ചം
എന്നെ തെറ്റിദ്ധരിച്ചെന്നു തോന്നുന്നു.
കള്ളി!
ഒന്നു തൊട്ടപ്പോഴേയ്ക്കും പൊള്ളിച്ചു കളഞ്ഞു,

(തമസല്ലോ സുഖപ്രദം..)
സ്വിച്ച് ഓഫ് ചെയ്തതേയുള്ളു
ഒറ്റക്കെട്ടിപ്പിടുത്തം
എന്നാലും
ഞാനൊന്നു പേടിച്ചു പോയി....

രൂപകാതിശയോക്തി

പൂവുകൾക്ക്
ഒടുക്കത്തെ ഒരു സങ്കടമുണ്ട്,
കൊഴിയുന്നതിൻ മുൻപ്
ചിറകുവീശി
മണം പരത്തി
ഒന്നു പറക്കാൻ പറ്റുന്നില്ലല്ലോയെന്ന്....!

നളൻ

             1
കനലിൽ ചുട്ട്
എണ്ണയിൽ വറുത്തുകോരി
വെള്ളത്തിലോ
നീരാവിയിലോ
പുഴുങ്ങി
അടുക്കളയിലടച്ചിട്ട് പുകച്ച്
മിക്സിയിൽ നെയ്പോലരച്ചെടുത്ത്
പലതരം മസാലകളിൽ
പല റെസിപ്പികളിൽ
അവളുടെ പുരുഷൻ
പാകപ്പെടുത്തിയ
നല്ല ഭക്ഷണം.

വിളമ്പുന്ന നേരത്ത്
അവൾ
അതേപ്പറ്റിയൊന്നും
ആലോചിക്കാതിരുന്നതാണത്ഭുതം!

               2
മലർത്തിയും കമിഴ്ത്തിയും
ചെരിച്ചുമിട്ട്
എത്ര രുചികരമെന്ന്
അവനതിനെ
പലവട്ടം
എണ്ണയിലോ
കനലിലോ ചുട്ടെടുത്തിട്ടുണ്ട്.

പച്ചകുമുളക് ,പുളി
കുരുമുളക് പൊടി,
വെള്ളുളി
തേങ്ങാപ്പാൽ
പാകത്തിനുപ്പുമിഴുകിച്ചേർന്നങ്ങനെ
മസാലമണം ബാക്കിയാവുമ്പോൾ
അവനതിനൊരു
തകർപ്പൻ പേരുമിട്ടു:
ഫിഷ് മോളി

കടലിൽ നിന്നു മുളപൊട്ടിയേക്കാം ഒരു ചെടി... ഇലകളിൽ പേരെഴുതിയത്

നീന്തലറിയാതെ
ആഴങ്ങളിലേയ്ക്ക് ചാടിയത്
സാഹസികത
അത്രമേലിഷ്ടമായതുകൊണ്ടാണ്
അല്ലാതെ
മരണത്തോട് ഒരിഷ്ടവുമുണ്ടായിട്ടല്ല

മരണം വൃത്തികെട്ട കുരങ്ങനാണ്
ഒരു ചില്ലയിലും
ഒതുങ്ങിയിരിക്കാതെ
ചാടി നടക്കും 
അപ്രതീക്ഷിതമായി
കയ്യിലിരിക്കുന്നതും തട്ടിപ്പറിച്ചു കൊണ്ടോടും

എനിയ്ക്കിഷ്ടം:
സാഹസികവും അപ്രതീക്ഷിതവുമായ ആഴങ്ങളാണ്
ദേവതമാർ വസിക്കുന്ന
ജലത്തിന്റെ ചില്ലുകൊട്ടാരച്ചുമരുകളാണ്
ഒരിക്കലുമുടഞ്ഞു തീരാത്ത
സ്ഫടിക ജലത്തറകളാണ്
മാർദ്ദവം ഞെഞ്ചിൽ വന്നുമുട്ടുന്ന
തണുത്ത ആശ്ലേഷങ്ങളാണ്
ശ്വാസം മുട്ടിക്കുന്ന
തണുത്ത
ജലചുംബനമാണ്

മെഴുകുതിരികൾ കത്തിച്ചു വെയ്ക്കാനാവാത്ത
ഇടുങ്ങിയ നീർക്കല്ലറകളിൽ ഞാൻ
മരണവുമായി രമിക്കും

ആഴങ്ങളിലേക്കുള്ള
ആർക്കും പിടികൊടുക്കാത്ത
ഒരു ദുരൂഹപതനം
അത്രമേൽ പഴുത്ത സ്വാദിഷ്ടങ്ങളായ പഴങ്ങളാണ്

നിലംപതിച്ച ഒരാപ്പിൾ പോലെ
എനിയ്ക്കു ഭൂമിയെ കെട്ടിപ്പിച്ചു കിടക്കണം
 
മഴ കഴിയുമ്പോഴേയ്ക്കും
എന്റെ പ്രണയ രേതസ്
ആപ്പിളിനുള്ളിൽ നിന്നു വിത്തുകളെ ഒഴുക്കിക്കൊണ്ടു വന്ന്
മണ്ണിലലിയിച്ച്
പൂവുകളുടെ അരക്കെട്ട് പൊട്ടിച്ച്
വേരുകളെ ഹർഷോന്മാദിയാക്കി
ഇലകളിൽ പേരെഴുതിയ പുതിയ  ചെടികളെ
മുളപൊട്ടിക്കണം

ഇടി വെട്ടി
ഭൂമി അതിന്റെ ആനന്ദത്തിന്റെ വിത്തുകൾ
എല്ലായിടത്തും വാരിവിതറണം

ഭൂമിയുടെ ആഹ്ലാദം
ആകാശത്തിൽ നിന്ന് എട്ടുദിക്കുകളിലേയ്ക്കും
അഴിഞ്ഞു വീഴണം

ഞാനപ്പോൾ
ആഴക്കടലിനടിയിലേക്ക്
വീണു നോക്കും
മരിക്കുവാനല്ല.
സാഹസികത എനിയ്ക്കത്രമേലിഷ്ടമാകയാൽ
ആഴമെനിയ്ക്കത്രമേൽ
ആനന്ദമാകയാൽ

ഒളിച്ചുകളി

ഓരോന്നു
സംസാരിച്ചുകൊണ്ടിരിക്കുന്നതിനിടയിൽ
പെട്ടെന്ന്
ഒരൊളിച്ചുകളിയാണ്

പിന്നെ,
നീയെവിടെ?
നീയെവിടെ?
എന്നൊരാന്തലാധിയായി..

മുക്കിലും മൂലയിലും
തെരച്ചിലോടു തെരച്ചിലായി
മൂടുപോയ കുട്ടയ്ക്കടിയിലും
ദ്രവിച്ച ഓലമറകൾക്കിടയിലും
പഴയ, വരണ്ടുണങ്ങി മഞ്ഞച്ച
പുല്ലിൻ കെട്ടിനിടയിലും
പുല്ലാനിപ്പടർപ്പിലും,
മഞ്ഞക്കിളി
മാമ്പഴച്ചാറുകൊണ്ടടയാളമിട്ട
മാവിൻ കൊമ്പിലും
മുളകൊണ്ടു കെട്ടിയുണ്ടാക്കിയ
തട്ടുമ്പുറത്തും
തിരച്ചിലോട് തിരച്ചിലാണ് .
കാണാതായി ഞാൻ കരച്ചിലോളമെത്തും

ആങ്ഹാ!
ഇവിടെയുണ്ടായിരുന്നോ നീയെന്ന്
സോഫയിൽ ചാരിക്കിടന്നുകൊണ്ടു്
നീ പെട്ടെന്ന് പ്രത്യക്ഷമാവും

പിന്നെ നമ്മൾ
ഒന്നും സംഭവിക്കാത്ത പോലെ
പഴയപടി സംഭാഷണം തുടരും
വാങ്ങുവാൻ പോകുന്നപുതിയ കാറിനെപറ്റി,
പെട്രോളിന്റെ വിലക്കയറ്റത്തെപ്പറ്റി  നീ;
കൊച്ചിയിലെ ഗതാഗതക്കുരുക്കിലൂടെ
റോഡു മുറിച്ചു കടക്കുന്നതിന്റെ
സാഹസത്തെ പറ്റി ഞാൻ

പണ്ടും
നാമങ്ങനെ
വിശേഷങ്ങൾ പറഞ്ഞിരുന്നല്ലോ,
ഒളിച്ചുകളിയ്ക്കു ശേഷം
വീട്ടിലേയ്ക്കു മടങ്ങുമ്പോൾ
പട്ടാളക്കാരൻ മാമൻ കൊണ്ടുവന്ന
ഹൽവയെപറ്റി നീയും
നനഞ്ഞ പുസ്തകത്തിൽ നിന്നൊലിച്ചുപോയ
ഉള്ളടക്കത്തെപ്പറ്റി
ഞാനും